Tomta klar

Mens vi ventar på at vinteren skal sleppe taket (vi er no inne i den sjette månaden med snø og vinter...), kan vi no sjå fram til at husbygginga omsider kan ta til. Bak Alfred og Iver ser de den ferdig utgravde tomta, med straum, vatn og fiber lagt fram. No er det klart for forskaling og støyping. Endeleg! Og heldigvis er vi fornøgd med den nøyaktige plasseringa av tomta også etter at den er gravd ut...

Vi har også fått testa ut dreneringstilhøva på tomta skikkeleg siste dagane, det har sikkert kome over 100 mm nedbør siste 2-3 dagar. Og alt renn tvers gjennom. Perfekt.

Under ser de Iver stå på kjøkenet i det nye huset. Viss han hoppar tre meter opp kjem han opp på det nye rommet sitt.

3. mars 2011

...gjekk grabben i jorda.

Litt før til alle grøftene som må til, men det var dagen for gravestart for sjølve huset. No held snøen på å smelte og telen gir seg etter kvart.

Det vert spennande å følgje med på korleis det går framover her. Vi er hovudsakleg på jobb når det skjer noko, men vår komande naboar passar godt på å rapportere og dokumentere høgdepunkta.

Her

Før vi gjekk på jobb i dag vart grunnsteinen lagt ned.

Ikkje sjølve grunnsteinen, men vi møtte entreprenør og dei som skal grave og slo ned eit par pinnar.

På biletet står Alfred inni kjøkenbenken. Med berre 12 meter til elva vert det mykje å sjå når ein vaskar opp. Vi må fjerne nokre greiner på treet, men det får stå.